Нејмар е фит и е подготвен да се врати на терените во Катар, тој синоќа го одработи тренингот со соиграчите од бразилската репрезентација, а денеска селекторот Тите потврди дека тој ќе игра против Јужна Кореја.

Утре (понеделник), Бразил против Јужна Кореја игра во осминафиналето од Светското првенство. Нејмар се враќа во составот по повредата која ја заработи во првото коло против Србија.
На денешната прес-конференција првото прашање за Тите беше дали Нејмар ќе игра. Тој одговори потврдно, а не сакаше да го открие и остатокот од составот.
„Да, Нејмар ќе игра. Ќе тренира и денеска и ќе биде дел од натпреварот. Ако нема никакви дополнителни проблеми, ќе биде дел од утрешниот меч, но останатите десет не ви ги кажувам. Но, секако ве уверувам дека ќе играм со тие фудбалери кои мислам дека се најдобри во моментов“, рече Тите.