Португалија беше меѓу трите селекции кои после 180 минути во Катар обезбеди осминафинале, но не блескаше. Требаше Фернандо Сантош да го остави Кристијано Роналдо на клупа, за „европските Бразилци“ да ја покажат сета своја моќ и да ја прегазат Швајцарија со 6-1 за четвртфинале и пресметка со Мароко меѓу најдобрите осум.

Првпат после 14 години, Роналдо беше резерва на голем турнир после 31 меч, а „изненадувањето“ на Сантош да го стави Гонсало Рамош во првите 11 излезе како полн погодок, зашто младиот напаѓач даде хет-трик, прв на овој Мундијал.

Рамош погоди од првиот шут во 17-та минута, голот беше велемајсторски. Пепе стана втор најстар играч со гол на Мундијал (безмалку 40 години) ја дуплираше предноста во 33-та минута и Португалците безмалку го имаа четвртфиналето во рака, но сѐ набрзина заверија во првите десет минути од вториот дел. Рамош даде втор гол во 51-та, па Рафаел Гереро во 55-та минута четврти гол, а Рамош комплетираше хет-трик во 67-та минута. Печат на спектакуларната победа во втората минута од судиското надополнување стави Рафаел Леао.

Мануел Аканџи во 58-та беше стрелец на почесниот гол на Швајцарија, која изгледа се истроши против Србија во битката за осминафинале, па вечерва во ниту еден момент не беше конкурентна против разиграните пиринејски бразилци.