Во македонската кошарка се појави еден голем талент и тоа во градот на реката Црн Дрим, ако се суди според неговите досегашни игри во својата категорија. Дион Шабани, 13-годишниот стружанец, завчера постигна неверојатни 88 поени во победата на кошаркарската екипа на Црн Дрим во дуелот со Феникс (94-90) во првенството за играчи до 14 години.

За успехот да биде поголем, кошаркарот од Струга до ова неверојатно поентерско остварување дојде без ниту една постигната тројка, а со 22 прецизно изведени слободни фрлања.

„Премногу сум возбуден бидејќи се уште не си верувам дека успеав да постигнам толку многу поени на натпреварот. Овој рекорд ќе биде голем мотив за мене и моето семејство да работиме и да стигнеме таму каде што сакам да се најдам, а тоа е врвот. Ќе работам напорно да станам кошаркар во целосна смисла на зборот“, изјави Шабани за Клан Македонија.

Талентираниот кошаркар веќе е добро познат на предводниците на македонската кошарка. Шабани веќе беше дел од повеќе репрезентативни акции и кампови под капата на КФМ. Оттаму од него очекуваат да продолжи напорно да работи и да се развива и за неколку години да се најде и во сениорскиот национален тим.