Екипата на Виљареал доживеа вистински дебакл и го загуби натпреварот со убедливи 3-0 (1-0) на гостувањето кај Лас Палмас во рамките на дваесеттото коло од шпанската Примера.
Домашниот тим уште во првите 45 минути го најави триумфот со голот на Кириан Родригез, кој стрелаше прецизно многу рано, во осмата минута од мечот. На паузата Лас Палмас водеше со 1-0, а во вториот дел само стави „печат“ на новиот триумф, за нив осми во сезоната.
Домашните имаа извонредна реализација на шансите, затоа што постигнаа три гола од исто толку обиди во рамките на голот. Најпрво Херцог зголеми на 2-0 во 51. минута, а конечните 3-0 ги постави одличниот Родригез во 63. минута и го впиша својот втор гол на овој меч.
Лас Палмас котира високо во Примера и сега е на седмата позиција со 28 бода, додека Виљареал продолжува со променливата форма и има само 19 бодови, доволни за четиринаесеттото место на табелата во Примера.