Македонскиот кошаркарски репрезентативец Ненад Димитријевиќ ја потврди одличната форма од репрезентацијата и во дресот на својот тим Уникс.

Нено брилјира на натпреварите на Уникс Казан и се поверојатно е дека ќе направи трансфер во некој голем европски тим по крајот на сезоната, бидејќи изданија како ова денеска станаа вистинска рутина за него.

Во реприза на финалето од минатата сезона, тимот од Казан го победи Локомотив Кубан со 80-76 и го искористи вчерашниот пораз на ЦСКА со што се искачи на првото место на табелата во ВТБ лигата. Двете екипи имаат ист број бодови (50), но поради подобрата кош-разлика, Уникс е нов лидер.

Димитријевиќ повторно беше најдобар во својот тим и ја истакна својата кандидатура за МВП на сезоната. Особено фантастично играше во првото полувреме во кое постигна 18 од своите 23 поени и долго време беше без промашување од игра и од линијата за слободни фрлања. Далеку зад него остана Маркус Најт со 15 поени.

Во следното коло се среќаваат Уникс и ЦСКА и тоа ќе биде директен дуел за првото место по основниот дел иако има уште многу да се игра.