Екипите на Манчестер Јунајтед и Ливерпул играа во големото дерби од четвртфиналето на англискиот ФА Куп, а до победа на крајот јстигна домашниот тим, кој славеше по голема борба и драма во продолженијата (4-3). Дуелот со сигурност ќе влезе во историјата на најстарото клупско натпреварување во светот, а „ црвените ѓаволи“ го слават триумфот против најголемиот ривал и патот кон „Вембли“. Во полуфиналето на ФА Купот претходно се квалификуваа Манчестер Сити, Челзи и Ковентри Сити.  

 

Манчестер Јунајтед дојдое во водство преку Скот Мектоминеј во 10. минута, но Ливерпул до крајот на првите 45 минути покажа дека е во подобра форма и неслучајно е меѓу главните кандидати за титулата во Премиер лигата. Алексис Мек Алистер донесе израмнување во 44. минута, а Мохамед Салах се запиша во листата на стрелците и го постави резултатот на паузата (1-2).

Во вторите 45 минути, Ливерпул ја контролираше играта и многу повеќе ја имаше топката во свој посед. Гостите имаа уште неколку изгледни прилики за зголемување на предноста., но сепак Јунајтед успеа да ги израдува своите фанови дури во 88. минута, кога Бразилецот Антони одлично се снајде во шеснаесетникот и успеа да го совлада голманот Келехер,
„ѓаволите“ израмнија на 2-2.
На стартот од продолженијата Ливерпул ја чекаше својата шанса и конечно успеа третпат да ја затресе домашната мрежа, овој пат преку Харви Елиот, кој биеше силно од дваесетина метри, топката се одби од Кристијан Ериксен и влезе во небранетиот долен лев агол од голот на Онана.

Домашните фудбалери не се предаваа и се обидоа со завршен налет да дојдат до ново израмнување, а тоа им успеа во 114. минута, кога Маркус Рашфорд конечно успеа да го совлада Келехер и го постигна третиот гол за тимот на Ерик Тен Хаг. И кога сите помислија дека победникот ќе биде решен во пенал-рулетот, на сцената стапи Амад Диало, кој доби одлична топка од Рашфорд и во 120. минута ги постави конечните 4-3, носејќи ерупција од воодушевување на „Олд Трафорд“.

На крајот „ѓаволите“ извојуваа голема и важна победа над вечниот ривал, со која обезбедија пласман во полуфиналето од ФА Купот и остануваат во игра барем за еден трофеј сезонава.