Македонскиот фудбалски шампион, екипата на Струга ТЛ, немаше премногу среќа на денешната ждрепка за првото квалификациско коло од Лигата на шампионите (ЛШ), откако за противник го доби еден од најсилните можни ривали, повеќекратниот словачки шампион Слован.

Станува збор за исклучително силен противник, кој во 1969 година победи во некогашниот Куп на куп победниците, а кој 22 пати беше шампион на Словачка и 17 пати освојувач на куп-натпреварувањето.

Првиот меч ќе се одигра на 9/10 јули во Братислава, а реваншот е седум дена подоцна на теренот на македонскиот првак. Поразениот од овој дуел ќе продолжи во 2.коло од квалификациите во Конференциската лига.