Бразилската ѕвезда на Барселона, Рафиња одигра одличен натпревар, постигна хет-трик во победата од 4-1 против Баерн Минхен во Лигата на шампионите. По натпреварот, тој сподели дека најдобриот негов натпревар за клубот допрва претстои.
„Дали ова беше мојот најдобар натпревар за клубот? Ова беше еден од најдобрите, но најдобриот допрва доаѓа“, изјави Рафиња, кој беше капитен на каталонскиот тим на натпреварот.
„Ова можеше лесно да биде финале на турнирот. Да победуваме на ваков начин, и тоа пред нашите навивачи, е најубавото нешто. Немам зборови да опишам како се чувствуваме. Мислам дека нашата игра на теренот зборува доволно. Секогаш сум сонувал да играм во големи дерби натпревари како овој и да имам важна улога во нив. Дури и во најсмелите соништа не сум замислувал дека мојот 100-ти натпревар за Барса ќе биде ваков“, продолжи Рафиња.
На прашањето за „Златната топка,“ тој одговори: „Златната топка е многу далеку, во моментов сум фокусиран на тоа да му помогнам на клубот.“
На Барселона сега и претстои Ел Класико, дуелот со Реал Мадрид на „Сантијаго Бернабеу“.
„Во Ел Класико секогаш шансите се 50 – 50. И двата тима влегуваме во натпреварот во добра форма, поради што е тешко да се каже кој е фаворитот“, посочи Бразилецот.
