Македонскиот селектор и ракометар на Нант, Кире Лазаров беше стрелец на два погодоци за францускиот тим во дуелот против фински Кокс (36-25) во рамки на седмото коло од Европската лига, па така му помогна на својот клуб да ја запише четвртата победа.

Нант го контролираше натпреварот од самиот почеток, па во завршницата од првото полувреме стигна до предност од пет голови разлика (16-11), а водството на Лазаров и другарите продолжи да расте на стартот на вториот дел, кога со мини-серија од 3-0 стигна до 20-12.

Кокс за момент се врати во живот и намали на пет гола негатива (17-22), по што Нант продолжи да доминира и да го полни голот на гостите за конечен триумф од 36-25.

Рок Овничек беше најефикасен во тимот на Нант со седум погодоци, додека Лазаров постигна два, а на спротивната страна најдобар беше Ерсин со четири гола.