Раководството на СЕХА лигата вчера донесе скандалозна одлука да го дисквалификува Вардар од Ф4 турнирот кој ќе се игра овој викенд во Задар. Причината е поради еден ракометар кој е позитивен на Ковид19. На местото на Вардар ќе настапи ППД Загреб.

Очекувано кај црвено-црните има големо незадоволство по оваа одлука на СЕХА а тренерот Веселин Вујовиќ за српските медиуми уште подетално ја објасни ситуацијата и ја нарече оваа одлука на регионалното натпреварување срамотна.

„Каква срамота. Тие велат дека само Борко Ристовски е позитивен додека за други седум играчи не поминале 14 дена од втората доза на вакцината, па поради тоа тие се критични. Сакавме да го повториме тестот, но тие не ни го овозможија тоа. Сите имаме ПЦР тестови, ги замоливме повторно да ги направат. Дури сакав да одам со 11 играчи кои имаат потврда за вакцинација, но не ни дозволија ниту такво нешто“ , изјави тренерот на Вардар.

Нашиот тим иако на терен се избори за 10-ти настап на завршните турнири во СЕХА, не му е дозволено спортски да се бори за својата шеста титула.