Одличниот Линдвик води по првиот ден од Светското првенство во скијачки летови

Светското првенство во скијачки летови годинава се одржува во Викерсунд, а по првиот ден домашниот скокач Мариус Линдвик води .

Норвешкиот олимписки шампион Мариус Линдвик (457,5 поени) води по првите две серии на Светското првенство во летови што се одржува во неговиот роден град Викерсунд.

Линдвик на леталницата направи скокови од 232,5 и 226,5 метри, што беше доволно за да го преземе водството. Австрискиот светски рекордер Стефан Крафт (451) се најде на второто место, а трет е Словенецот Домен Превц (437,6).

Бранителот на титулата Германецот Карл Гајгер (389,9) е само 13-ти и најверојатно нема да ја брани победата од Планица 2020 година.

Третата и четвртата серија се закажани за сабота во 16:30 часот.