Лукас Тореира ја врати Фиорентина на победничкиот колосек после два меча без победа, па неговиот гол на 20 минути пред крајот ја скрши Болоња, за „виолетовите“ да останат во тесната трка за излез во Европа во следната сезона.

Уругваецот Тореира погоди во 70-та минута, кога Фиорентина на „Артемио Франки“ беше бројчано надмоќна, откако Болоња четири минути пред полувремето остана со десетмина во поле. Кевин Бонифаци во 23-та и во 41-та минута доби по еден жолт картон, а со тоа и исклучување, по што Болоња не можеше да одолее до крајот за да извади барем бод.

Фиорентина со победата, 14-та сезонава, дојде до 46 бода на осмото место колку што има и Лацио на седмото, само бод помалку од Аталанта и Рома. Болоња, пак, го запиша 13-от пораз сезонава и остана на 33 бода на 12-то место, 11 од опасната зона.