Младата украинска атлетичарка Јарослава Махучик, дојде до златниот медал на Светското првенство во атлетика во сала во Белград и тоа во дисциплината скок во височина со прескокнати 202 сантиметри.

Новата светска шампионка најсјајниот медал го посвети на својата татковина, која се наоѓа во тешка ситуација по агресијата од страна на Русија, поради што беше емотивна на прес-конференцијата по големиот успех.

„Ова е медал за моите сограѓани и војници. Среќна сум што ја претставувам Украина“, изјави Махучик.

Таа објасни што се ѝ се случувало од 24 февруари, кога почна рускиот напад врз Украина и дека минала низ пекол само за да стигне до Белград.

„Беше тешко кога почна нападот и веднаш со родителите побегнавме на село. Во таа недела не помислував на тренинг, а не, пак, на натпреварувањата. Но, добив повик од федерацијата дека мора да настапам и да се борам за Украина. Четири дена патував до Белград, а потоа ќе заминам за Германија. Се надевам дека наскоро ќе може да се вратам во мојата татковина“, дополни новата светска првенка.