Реал Мадрид се уште има огромна предност на првенствената табела во Примера и се е во рацете на „кралевите“, но фановите на клубот сигурно ќе имаат неколку непријатни дена пред нив после тешкиот пораз од Барселона.
Тимот на Чави Ернандес ги искористи сите слабости на Реал оваа вечер и постигна четири гола во мрежата на домашниот тим, а од друга страна, успеа да ги исконтролира сите контра-напади на домашниот тим и одигра перфектен меч во одбрана.

Карло Анчелоти се одлучи за постава со тројца стопери во ситуација кога ја измени тактиката во отсуство на Карим Бензема, но потоа продолжи да менува и на полувреме ги извади Крос и Карвахал, а во игра ги стави Камавинга и Диаз.

– Започнавме со одбрана со тројца, се обидовме да играме добро еден на еден, но не излезе како што треба. Ова не беше наша ноќ. Жалиме за прикажаното, но имаме предност и сега треба да се одмориме и да се подготвиме добро во наредните две седмици. Со двете измени на полувреме се обидов да играме повисоко и да вршиме пресинг, но не излезе добро и тоа е моја вина.

– Ова е „Ел Класико“, никој не сака да загуби на ваков меч, загубивме една битка, но имаме предност и мора да останеме мирни. Нема потреба да се прави драма, денеска бевме непрепознатливи и се излезе лошо. Да го заборавиме овој меч, вината за овој резултат е моја, – гласи првата изјава на Анчелоти.