Селекторот на ракометната репрезентација на Mакедонија, Кирил Лазаров го објави списокот со 23 играчи со кои ќе ѝ се спротивстави на Чешка во баражот за пласман на Светското првенство.

Откако веќе беше објавен список со 35 ракометари, дванаесет од нив отпаднаа од комбинација пред првиот собир на репрезентацијата. По „резот“, во комбинација за настап останаа и двајца дебитанти во имињата на Дарко Кондев и Петар Атанасијевиќ, кои ќе кандидираат за местото десно крило покрај искусниот Гоце Ојлески. На списокот го нема повредениот Цветан Кузманоски.

Лазаров ќе ја одржи првата прозивка на деветти април (сабота) во 18:30 часот во хотелот „Александар Палас“ во Скопје. Првиот дуел се игра во Злин, Чешка на 13 април од 20:15 часот, додека реваншот е четири дена подоцна во Скопје од 19:00 часот.

Подобриот од овој двомеч ќе обезбеди билет за пласман на Мундијалот кој ќе се одржи во Полска и Чешка.