Квича Кваратсхелиа, најголемата ѕвезда на Грузија и нов соиграч на Елид Елмас во Наполи од летово, после убедливите 5-2 со Бугарија во Разград вчеравечер, ни најави дека тој и соиграчите доаѓаат по одмазда за поразот во баражот во ноември 2020 година во Тбилиси во финалето за пласман на Европското првенство.

Грузија по две кола има максимални шест бода со џиновска гол-разлика 9-2, а во минатото издание двапати игравме во групата и двапати ремизиравме идентично 1-1, по што следеше финалето во баражот кое го реши Гоан Пандев за историски прв пласман на Македонија на големите турнири.

„Оваа победа во Бугарија е уште поголема мотивација за нас. Јас сум среќен што на тимот му помагам, без оглед дали е со гол или со асистенција. Не е битно тоа, најважни се победите. И сега доаѓаме во Македонија по одмазда. Македонија ни е голем должник, нешто големо испуштивме со нив и сега сакаме тоа да го вратиме. Ќе сториме сѐ за грузиските навивачи да бидат задоволни, да напредуваме. Не криеме, целта ни е дефинитивно да играме на Европското првенство“, вели Кваратсхелиа.

Првата ѕвезда на Грузијците против Гибралтар на стартот имаше гол и асистенција и го реши победникот во првите пола час (4-0 на крајот), а вчера со Бугарија двапати асистираше и даде еден гол од пенал во тирумфот со 5-2.

Дуелот на Македонија и Грузија на Националната Арена „Тодор Проески“ се игра во четврток од 20.45 часот. Грузија по две кола е прва со шест бода, Македонија има четири, Бугарија само еден, а Гибралтар е без бодови.