Третиот ден од натпреварите во пливање на Светското првенство во Будимпешта го одбележаа Италијанецот Томас Чекон со нов светски рекорд на 100 метри грбно (51,60 секунди) и Американката Кејти Ледеки, која го освои своето 17. светско злато со триумф на 1500  м слободен стил.

21-годишниот Италијанец Томас Чекон е сопственик на првиот светски рекорд поставен на пливачките натпревари на Светското првенство во Будимпешта. Чекон го надмина за 25 стотинки претходниот рекорд на Американецот Рајан Марфи од Олимпијадата во Рио де Жанеиро во 2016 година.

Марфи прв сврте на 50 метри во финалето во Будимпешта, но во втората половина од трката Чекон беше скоро половина секунда побрз и стигна до светското злато, додека американскиот пливач мораше да се задоволи со среброто (51,97). Само стотинка побавен од Марфи беше неговиот сонародник Хантер Армстронг (51,98) кој го освои бронзениот медал.

Покрај првиот златен медал на светските првенства, 21-годишниот Чекон освои и парична награда од 50.000 долари за нов светски рекорд.

Големата американска пливачка на долги патеки Кејти Ледеки го освои својот 20. медал и 17. злато на светските првенства со победата на 1500 метри слободно. Ледеки стигна до вториот триумф на ова Светско првенство, по саботната трка на 400 метри, со 15:30,15 минути, победувајќи ја второпласираната сонародничка Кејти Грајмс (15:44,89) за повеќе од 14 секунди. Бронзата ја освои Австралијката Лани Палистер (15:48,96).

Романецот 17-годишниот Давид Поповичи е новиот светски шампион на 200 метри слободно, а своето прво сениорско светско злато го достигна со поставување на нов јуниорски светски рекорд (1:43,21 минути). Со тоа го подобри своето најдобро време од неделното полуфинале за цели една секунда и 19 стотинки. Поповичи немаше вистински конкурент, бидејќи второпласираниот Кореец Хванг Сунву заостануваше повеќе од една секунда (1:44,47). Бронзата ја освои Британецот Том Дин (1:44,98).

Американката Реган Смит (58,22 секунди) ја одбрани титулата светски шампион на 200 метри грбно освоена пред три години во Гвангжу, Кореја. Двојно американско славје спречи Канаѓанката Кајли Мас (58,40) која го освои среброто, пред бронзената Клер Керзан (58,67).

Успехот на италијанското пливање го комплетираше 17-годишната Бенедета Пилато, која го додаде своето прво светско злато на титулата европски шампион на 50 метри градно на двојно подолга делница (1:05,93 минути). Во многу изедначена трка Италијанката ја победи второпласираната Германка Ана Елендт за пет стотинки (1:05.98), а бронзата ја освои Литванката Рута Меилутите (1:06.02.). Изненадувачки, без медал остана актуелната двократна светска шампионка и светска рекордерка во оваа дисциплина, Американката Лили Кинг (1:06.07), која го освои четвртото место.