Црногорските кошаркари се пласираа во осминафиналето на Европското првенство совладувајќи ја Грузија со резултат 81:73.
На Црна Гора и припадна драмата против домаќинот, со што го освои последниот билет за осминафиналето на ЕП во Берлин во групата А.
Избраниците на Бошко Радовиќ патем ја избегнаа Словенија, па во осминафиналето ќе играат со Германија, додека Дончиќ и неговите избраници ќе се сретнат со четвртопласираните Белгијци.
Ова е втор последователен пласман за Црна Гора во осминафиналето на ЕП во кошарка, по последното Европско првенство на кое завршија на тринаесеттото место, а главен „виновник“ за тоа беше Игор Дробњак кој покрај поголемите имиња во својот тим, ја презеде одговорноста и го замолкна Тбилиси.
Немаше многу поени на стартот на натпреварот, но Црна Гора беше таа која нешто подобро го отвори натпреварот.
Гостите имаа предност од шест поени, но Грузија набрзо се врати и израмни (26:26).
Во средината на вториот дел никој не можеше да погоди ништо, а потоа Дробњак го започна својот танц со две тројки во два напади.
Дубљевиќ беснееше по судиите, а Црна Гора на полувремето водеше со 41:35.
Грузија можеше да се врати во игра на средината на третата четвртина кога Радовиќ доби техничка и Мекфејден постигна четири поени во еден посед.
Пери, сепак, се распали, а Дробњак погоди тројка од аголот со звукот на сирената за нови +6.
Во последниот дел Грузија имаше многу шанси да се врати во игра, но и Црна Гора можеше значително да се „одлепи“.
Домашните немаа сили да зададат нов удар, па Црногорците го доведоа натпреварот во релативно мирна завршница.
Најдобар кај победниците беше споменатиот Дробњак со 22 поени (9/13 од поле).
Пери постигна 17 поени со девет асистенции, а Дубљевиќ имаше десет поени со само два скока и пет прекршоци.
На другата страна Мекфејден постигна 16 поени, Мамукелашвили 15, а Санадзе и Шермандини постигнаа по 14 поени.
Црна Гора ќе се сретне со Германија на 10 септември.
