Селекторот на Шпанија, Луис Енрике го објави списокот од 25 фудбалери на кои ќе смета за претстојните натпревари со Швајцарија и Португалија од Лигата на нациите. Тој повика некои нови играчи за да ги испроба во националниот тим иако се работи за натпревари од ЛН, а за нецели два месеци почнува и СП. Енрике го повика 20-годишното крило на Атлетик Билбао Нико Вилијамс, 22 годишниот халф на Валенсија Хуго Гијамон како и напаѓачот на Бетис Борха Иглесиас. Гијамон има два настапи додека другите немаат ниту еден.
На списокот се и голманите на Брајтон Роберт Санчес и на Брентфорд Давид Раја.
Во групата не се Давид де геа, Серхио Рамос, Ансу Фати и Маркос Алонсо, Тијаго Алкантара, Иниго Мартинес и Раул де Томас.
Изненадување е тоа што во составот е вклучен Жорди Алба кој во моментов е трет избор за лев бек во Барселона по Маркос Алонсо и Алехандро Балде.
Шпанија е лидер во групата 2 на Лига А од ЛН со 8 поени од 4 меча.