Роберт Федерер, таткото на еден од најдобрите тенисери на сите времиња, Роџер Федерер, изјави дека неговото семејство претрпело поголема болка од Новак Ѓоковиќ, отколку од Рафаел Надал, пренесуваат швајцарските медиуми.

Роџер минатиот викенд на „Лејвер купот“ го одигра последниот меч во кариерата и тоа во двојка заедно со големиот ривал од Шпанија.

„Поразите од Ѓоковиќ повеќе нѐ болеа од тие од Рафа. Особено ни е во сеќавањето неуспехот во Лондон во 2019 година, кога Роџер имаше две меч-топки во финалето на ‘Вимблдон“ и тоа на негов сервис. Сите веќе ја видовме таа титула во неговите раце“, изјави Федерер сениор.

Тој исто така потсети на полуфиналните средби на „Ју-Ес опен“ во 2010 и 2011 година.

„Тешки моменти ни беа и во полуфиналињата во Њујорк во 2010 и 2011 година против Новак. Роџер и тогаш пропушти две шанси да ја доврши работата“, дополни Роберт.

Ѓоковиќ и Федерер одиграа 50 меѓусебни дуели со скор 27-23 во корист на српскиот тенисер.