Многу познати ликови вечерва беа во Париз во театарот „Шателе“, Зинедин Зидан, Луис Фиго, Бразилецот Роналдо, Андреј Шевченко…
Сите дојдоа да го поздрават новиот добитник на Златната топка, а имаше десет номинирани.
Карим Бензема, Ерлинг Халанд, Роберт Левандовски, Садио Мане, Килијан Мбапе, Лука Модриќ, Кевин Де Бруин, Тибо Куртоа, Мохамед Салах и Винисиус Жуниор беа фудбалерите номинирани за Златната топка.
Водител на емисијата вечерва беше Дидие Дрогба, кој се испроба во нова улога, а друштво му правеше Санди Ерибер.
Најпрво беше доделена наградата за најдобар млад играч по име „Трофеј Копа“, а тоа е фудбалерот на Барселона – Гави. Подоцна, наградата „Сократ“ му беше доделена на Садио Мане, кој е познат по својата добротворна работа и скромност.
Алесија Путелас е најдобрата светска фудбалерка, а најдобар голман е Тибо Куртоа, додека Левандовски е најдобар напаѓач, односно стрелец на најмногу голови за клубот и репрезентацијата, па го доби „Герд Милер” трофејот.
Најдобар клуб е Манчестер Сити, а потоа конечно го добивме вистинското, а тоа е прогласувањето на Бензема за најдобар во светот.
Заслужено, мора да се признае, а наградата му ја врачи Зинедин Зидан, последниот француски добитник на Златната топка до сега.
