Милан ќе игра во осминафиналето во Лигата на шампиони за прв пат по 2014 година откако вечерва во последното коло од групната фаза го совлада Салцбург со 4-0. Французинот Оливие Жиру ја одигра главната улога во тимот со два гола и две асистенции. Ветеранот прво погоди со глава во 14.минута по корнерот на Сандро Тонали. На самиот старт на второто полувреме Жиру со глава му асистираше на Раде Круниќ, кој исто така со глава го матираше голманот на Салцбург. „Деветката“ на Милан го постигна својот втор гол во 57.минута. Работата ја заврши Жуниор Месијас во финишот по асистенција токму на Жиру.

Челзи со 2-1 со пресврт го совлада Динамо Загреб. Откако Бруно Петковиќ погоди за 0-1, Рахим Стерлинг и Денис Закарија го свртеа резултатот за „сините“. Двајцата македонски репрезентативци Стефан Ристовски и Аријан Адеми беа во почетниот состав кај „модрите“, но не го доиграа натпреварот, бидејќи излегоа од игра во второто полувреме.

Челзи го освои првото место во групата Е со 13 бодови, Милан е втор со 10. Салцбург продолжува во Лигата на Европа со шест бодови, додека Динамо е последен со четири.

Манчестер сити го потврди првото место во групата Г откако со 4-1 ја совлада Севилја. Борусија Дортмунд ремизираше 1-1 на гостувањето кај Копенхаген и му се придружи на премиерлигашот во нокаут фазата. Севилја е трета и продолжува во Лигата на Европа.