Светското првенство во Катар почнува в недела со натпреварот меѓу домаќинот и Еквадор. Турнирот ќе биде специфичен по тоа што првпат се одржува во зима, среде клупска сезона и во земја од Блискиот Исток. Тоа ќе биде 22. издание на Светското првенство, а првото се одржа во 1930 година во Уругвај.

Во Катар ќе се натпреваруваат 32 репрезентации поделени во осум групи по четири, а на Светското првенство во Соединетите Американски Држави, Мексико и Канада ќе учествуваат 48 земји.

Во текот на 98 години на Мундијалите се одиграа големи натпревари и беа поставени различни рекорди.

Најчесто се зборува за рекордниот број на голови. Првото место го држи германскиот напаѓач Мирослав Клосе со 16 голови. Од активните играчи кои ќе играат во Катар, најблиску до него е сонародникот Томас Милер со десет гола. Ова се другите рекорди.

РЕКОРДИ НА СВЕТСКИТЕ ПРВЕНСТВА

  • Земја со најмногу настапи на Светското првенство: Бразил (21)
  • Играч со најмногу титули на Светското првенство: Пеле (1958, 1962 и 1970 година со Бразил)
  • Играч со најмногу настапи на Светското првенство: Лотар Матаус (25 за Германија)
  • Играч со најмногу голови на СП: Мирослав Клосе (16 за Германија)
  • Најстар играч кој настапил на Светското првенство: Есам Ел-Хадари за Египет во 2018 година (45 години и 161 ден)
  • Најстар играч кој го освоил Светското првенство: Дино Ѕоф со Италија во 1982 година (40 години и 133 дена)
  • Најмладиот играч кој го освоил Светското првенство: Пеле со Бразил во 1958 година (17 години и 249 дена)
  • Најмладиот играч што се појавил на Светското првенство: Норман Вајтсајд за Северна Ирска во 1982 година (17 години и 41 ден)
  • Најмногу победи по пенали: Германија и Аргентина по четири натпревари
  • Најмногу порази по пенали: Англија, Италија и Шпанија по три натпревари
  • Најмногу елиминации во групната фаза на светските првенства: Шкотска со осум од осум мундијали и Јужна Кореја со осум од десет мундијали.
  • Најголема победа на Мундијалот: Унгарија против Ел Салвадор во 1982 година (10-1)
  • Најголемата победа во нокаут фазата на Светското првенство: Шведска против Куба во 1938 година (8-0)
  • Најмногу пласмани меѓу четирите најдобри репрезентации: Германија (13)