Можеше да има само еден победник меѓу двајцата големи пријатели. Килијан Мбапе и Ашраф Хакими се сретнаа во полуфиналето на Мундијалот, а Французинот беше поуспешен бидејќи „триколорите“ ги совладаа Мароканците со 2-0.

Веќе во тунелот пред да излезат на теренот, Мбапе и Хакими, кои се соиграчи во ПСЖ, срдечно се поздравија и се прегрнаа, а кога почна натпреварот престанаа да се познаваат.

И двајцата имаа солидни настапи. Со оглед на пласманот во финалето, Мбапе имаше причина за славење, а Хакими остана да тагува.

Мбапе со месеци се соочува со различни критики, медиумите го прикажуваат како арогантно детиште, но потегот кон Хакими на крајот од натпреварот покажа каков човек всушност е Французинот.

Најдобриот играч на „триколорите“ го размени дресот со Хакими, го утеши, а потоа го облече дресот на мароканскиот фудбалер и им се придружи на соиграчите во славјето.