Преку ноќ да се создаде успешна фудбалска приказна како таа на ПСЖ или на Манчестер сити не успева секогаш, односно во поголем дел од случаите пропаѓа, а таква е и приказната со кинескиот Гвангжу, кој се наоѓа пред згаснување.

Клубот кој во последната деценија потроши неколку стотици милиони долари на тренерски имиња како Фелипе Сколари, Марчело Липи, Фабио Канаваро, на играчи како Паулињо, Џексон Мартинез, Талиско, Алан и започна изградба на најголемиот стадион на светот за 1,9 милијарди долари, испадна од првата кинеска лига откако победи само на три од 33 меча и сега му следува бришење од фудбалската мапа.

Името на клубот до неодамна беше Гвангжу Евергранде, но главниот спонзор прогласи банкрот откако долговите достигнаа неверојатни 250 милијарди долари и тоа предизвика заминување на сите играчи од тимот.

Интересно е што во минатото, кога спонзорот „Евергранде“ фрлаше тешки милиони, клубот го имаше и третиот најплатен фудбалер на светот, Дарио Конка, кој во 2011 година заработуваше 200.000 долари неделно и пред него, според примањата, беа само Кристијано Роналдо и Лионел Меси.