После големиот триумф на „Камп Ноу“ откако ја сомлеа Барса во Купот, Реал Мадрид вечерва беше шокиран во Ла Лига.  Вилјареал предводен од Нигериецот Самуел Чуквуезе го потопи „кралот“ со победата од 3-2 и сега Барса има шанса да избега на плус 15 бода и да се круниса за нов првак.

Нигериецот Чуквуезе со феноменален гол на десет минути пред крајот го шокираше цел „Бернабеу“, зашто Реал Мадрид двапати водеше на натпреварот, но „жолтата подморница“ успеваше двапати да се врати во мечот, а на крај го зададе завршниот удар за голем триумф.

Пау Торес постигна автогол за водство на Реал во 16-та минута, но откако Вилјареал промаши неколку одлични шанси, Чуквуезе со мала мајсторија го изврте Начо и изедначи во 39-та. Три минути во вториот дел, Винисиу Жуниор повторно го донесе Реал во водство, но Хосе Моралес во 70-та вторпат го врати Вилјареал во натпреварот, за на крај Нигериецот да му пресуди на кралскиот клуб и да го реши мечот.

Барселона игра утре дома со Жирона и има шанса да избега на плус 15 од Реал на 10 кола до крајот, што значи дека сѐ поизвесна е разврската за шампионската круна, зашто во таков случај со уште 30 бода во оптек, на Каталонците ќе им требаат само уште пет победи ако „кралевите“ сѐ победат до крајот.

Вилјареал со триумфот се врати во трката за ЛШ, сега е петти со 47 бода, четири зад Реал Сосиедад.