Првиот човек на КК Партизан, Остоја Мијајловиќ, се обиде да испрати порака до навивачите кои вечерва ќе ги бодрат своите миленици во „Штарк арена“ кои го играат петтиот, решавачки натпревар во АБА финалето.

Резултатот е 2:2, па вечерва во мајсторката ќе се одлучува кој ќе ја освои титулата во АБА лигата.

„Црно-белите“ ја дочекуваат Црвена Звезда од 20 00 часот, а Мијајловиќ се обиде да прати порака до „гробарите“ дека треба противникот да биде дочекан на ниво и да не се повторат оние сцени од пред неколку дена во салата „Александар Николиќ“, кога на терен навивачите на Звезда фрлаа разни предмети.

„Овој натпревар е шанса да ја крунисаме оваа наша сезона. Со години ја подигавме организацијата, се подигавме од пепелта. Вечерва треба сите да се бориме за нашите момци, силно и гласно, до конечната победа. Вечерва веројатно ќе биде вечер на нашите навивачи. До сега имавме повеќе од пола милион публика на домашните натпревари. Во Европа тешко дека некој ќе собира толку фанови во една сезона, „гробари“ ви благодарам од срце, но вечерва е моментот кога треба да бидеме дисциплинирани. Не смееме да ја пропуштиме оваа шанса, Партизан заслужува да победи и ќе победи“, порача Мијајловиќ.