Извонредниот бек на белградски Партизан и капитен на црно-белиот тим во неодамна завршената сезона е нов кошаркар на Барселона. Американецот веќе потпишал договор со шпанскиот гигант, пренесуваат српските медиуми.

„Еурохупс“, пак, пишува дека поранешниот капитен на Партизан потпишал двегодишен договор со Барселона, кој ќе чини шест милиони евра, од кои 3.200.000 за кошаркарот. Таа понуда е подобра од онаа што Панатинаикос му ја подготви на Американецот, иако неодамна се зборуваше и пишуваше дека грчкиот тим е најблиску до потпис со играчот кој пред само неколку дена стана МВП на финалната серија на АБА лигата.

ПAO не беше единствениот заинтересиран клуб – во понеделникот пристигна вест дека за Пантер е заинтересиран и Реал, но потоа Барселона тргна во офанзива. Се чини дека сè е завршено многу брзо и Пантер се сели во Каталонија.

Веста за потписот на Кевин Пантер дојде само неколку часа откако Барселона претрпе огромна промена на клупата. Шарунас Јасикевичиус си заминува, а тимот во наредниот период ќе го предводи поранешниот шпански репрезентативец Роже Гримау.