Последните години Барселона извади неколку големи таленти од својата школа, некои станаа носители на играта на тимот, а некои брзо паднаа во сенка, па дури и си заминаа, но никој не го направи она што му успеа на 17-годишниот Марк Гују.
Поради големиот број повредени фудбалери, тинејџерот вчера се најде на списокот на Чави за дуелот со Атлетик Билбао, а потоа, од немајкаде, во обид да се постигне гол, доби шанса во последните 15-тина минути, сметајќи го и продолжението. Во својот прв контакт со топката, Гују го совлада противничкиот голман и ѝ донесе на Барса важни три бода во обидот да се стигне големиот ривал Реал Мадрид.
За тоа му требаа само 33 секунди во игра со што 17-годишникот стана најбрз стрелец во историјата на Барселона. Во игра влезе во 78:41 минута, а голот го постигна во 79:14 минута и сето тоа во своето деби за првиот тим на каталонскиот клуб.
Интересно е тоа што синоќешниот гол беше прв за него оваа сезона иако игра и за Б-тимот на Барселона во Третата лига. Таму забележа еден настап досега и не се запиша во листата на стрелците, но затоа е меѓу голгетерите на актуелниот шпански првак.
Барселона настапи на мечот со Атлетик Билбао со доста изменет состав и без неколку стандардни стартери, па во таква ситуација, Чави Ернандес повторно мораше да се потпре на школата и да им даде шанса на играчи од „Ла Масија“.
Сосема очекувано, 17-годишниот Гују се претвори во топ тема во јавноста по натпреварот, а Чави образложи зошто го избрал него и откри што му порачал пред да влезе во игра.
– Помислив на него бидејќи има гол во себе, има искра во себе и тоа навистина ми се допаѓа. Немам проблем да се потпрам на децата од школата. Имаме талент, само треба да им се даде доверба и поддршка. Така беше со мене, така е и со новите играчи. Кога гледаме дека едно момче е подготвено за игра, го испраќаме на теренот.
– Пред да влезе во игра, му кажав дека ќе има една шанса за гол и дека ќе ја реализира. Јас секогаш сум позитивен со играчите, а особено со младите, им давам поддршка пред да влезат во игра. Младите фудбалери се желни за докажување и подготвени за игра. Имаат храброст, а и ние имаме храброст да ги внесеме во првиот тим. Марк е фантастично момче, работи напорно и подготвен е да ни помогне кога ќе треба, – изјави Чави.
