Јаник Синер со максимален ефект ја заврши групната фаза од Мастерсот во Торино откако во последниот дуел го совлада Холгер Руне со 2-1 (6-2, 5-7, 6-4) а претходно ги совлада Циципас и Ѓоковиќ.

Италијанскиот тенисер, не само што освои нови бодови на своето конто, туку ги доби симпатиите на сите искрени спортски љубители затоа што победи, поради шпекулациите дека ќе загуби и со тоа ќе придонесе за елиминација на Новак Ѓоковиќ. Со триумф на Руне денеска, во полуфиналето ќе се пласираа тој и Синер, а Ѓоковиќ ќе мораше да патува дома. Вака, Руне ги пакува куферите, а Синер и Ѓоковиќ го продолжуваат својот настап на последниот турнир од сезоната.

Изгледаше дека италијанецот многу лесно ќе дојде до триумфот по фуризниот почеток и водство од 4-0 во првиот сет. Руне не успеа да направи ништо посебно, па Синер лесно дојде до предност од 1-0 во сетови. На стартот од вториот сет, домашниот тенисер се пожали на болки во грбот, но продолжи да игра. Руне го искористи тоа за да израмни на 1-1, но кога се чинеше дека е подготвен за пресврт и победа на овој дуел, Синер со последните сили триумфираше и во третиот натпревар.

Клучен беше деветтиот гем во кој на сервис на Руне, Синер поведе со 40-0, но ја искористи дури третата брејк-топка. Во следниот гем, Италијанецот не дозволи изненадување и рутински ја доврши работата. Своите противници во полуфиналето, Синер и Ѓоковиќ ќе ги добијат по утрешните натпревари од другата група каде се среќаваат Алкараз и Медведев, односно Рубљев и Зверев.