Уругваецот Луис Суарез синоќа се прости од навивачите на Гремио на величествен начин, на последниот натпревар на домашен терен оваа сезона.
Клубот од бразилскиот Порто Алегре играше со Васко де Гама и победи со 1-0, а уругвајскиот репрезентативец го постигна победничкиот гол. По завршувањето на натпреварот, Суарез беше испратен од домашните фанови на величествен начин, долго време од трибините се скандираше неговото презиме, а Гремио му подготви и специјално видео кои можеа да го погледнат сите на стадионот.
„Испиша прекрасно поглавје од нашата историја. Каде и да си, ќе останеш бесмртен за нас“, објави Гремио.
Луис Суарез успеа да ги освои срцата на навивачите за неполна година бидејќи договор со Гремио потпиша на 31 декември 2022, а дебитираше на 4 јануари. Со оглед на повредите, малкумина веруваа дека ќе успее да се снајде во бразилското првенство, но Ел Пистолеро покажа зошто е еден од најдобрите голгетери на сите времиња. На 53 настапи за Гремио, постигна 27 гола, а во националното првенство на Бразил, на коло пред крајот, се наоѓа на четвртото место на листата на стрелци со 15 гола, плус 11 асистенции. Последниот натпревар ќе го одигра в среда навечер, на гости кај Флуминенсе, а од новата година ќе биде член на Интер Мајами каде ќе игра заедно со Меси, Бускетс и Алба, неговите големи пријатели и соиграчи од Барселона.
