Македонската ракометна репрезентација се покажа во најдобро издание во бараж реваншот за пласман на Светско првенство, па така нашиот најдобар тим повторно ќе биде дел од едно големо натпреварување.

Лошиот резултат на гостувањето во Торшавн беше брзо заборавено со магичната вечер во „Борис Трајковски“, од која дел беа и над 7 илјади македонски фанови кои беа ветер во грб за Кирил Лазаров и неговите ракометари.
Македонија успеа да направи пресврт и со победа од осум голови обезбеди мундијалска виза, а едно од најголемите изненадувања на мечот беше Марко Митев кој постигна седум гола во мрежата на Фарски Острови.

– Пред се сакам да се заблагодадрам на целата публика, на фановите кои дојдоа тука и на луѓето кои не бодреа од малите екрани. Горд сум што сум Македонец и навистина треба да славиме. Мислам дека вакво нешто не се случило.

– На првиот меч таму игравме ноншалантно, сега се променија многу работи и влеговме многу мотивирани. Публиката ни беше ветер во грб, победивме добра и силна репрезентација која според мене многу ќе расте во иднина, – изјави Митев.