Репрезентацијата на Србија не дозволи изненадување и со победа ја заврши групната фаза од олимпискиот кошаркарски турнир.

Во последното коло, „ српските орли“ го совладаа Јужен Судан со 96-85 и покрај тоа што долго време се мачеа против дебитантот на најголемата светска спортска манифестација. Србија доминираше во најголемиот дел од дуелот и беше во водство, но африканската селекција не се предаде во ниеден момент и на секоја серија на противникот, одговараше со иста таква.

Сепак, во финишот до израз дојде искуството на српските кошаркари, како и подолгата клупа на селекцијата на Светислав Пешиќ. Суданците немаа одговор за Богдановиќ и Јокиќ, а во клучните моменти се разиграа уште Јовиќ, Мициќ и Петрушев и на крајот победата беше дури и убедлива.

Богдановиќ овојпат беше најефикасен кај Србите со 30 поени на кои додаде 8 асистенции, додека Јокиќ оствари дабл дабл со 22 поена и 13 скока. Кај Јужен Судан, Џонс и Шејок постигнаа по 17 поени.

Со оваа победа, Србија ѝ помогна и на Грција да се пласира во четвртфиналето, а актуелниот светски вицешампион во следната фаза ќе се сретне со Австралија. Јужен Судан не успеа да се избори за пораз до два поена разлика и го заврши својот настап на Олимписките игри како најслаба третопласирана репрезентација.

Покрај Србија и Соединетите Американски Држави од групата Ц, во четвртфиналето се наоѓаат уште Канада и Австралија од групата А, Германија и Франција од групата Б, како и Бразил и Грција како најдобри две третопласирани селекции од трите групи.