Екипата на Ливерпул го задржа максималниот ефект во Премиер лигата откако во дербито на третото коло славеше на гостувањето кај Манчестер Јунајтед со 3-0.

„Црвените“ од Енфилд уште немаат примен гол оваа сезона во домашното првенство, а заслужија уште поубедливо да го совладаат големиот ривал кој уште еднаш беше тотално очаен. Пред се, тоа се однесува на Каземиро кој уште еднаш потврди дека е во голем пад во формата откако си замина од Реал Мадрид во 2022 година.

Бразилецот киксираше за првите два гола на Ливерпул, буквално подарувајќи му ја топката на противникот по што Луис Дијаз два пати ја затресе мрежата на Онана. Точка на дуелот стави Мохамед Салах кој седми натпревар по ред беше стрелец во дуелите со Манчестер Јунајтед.

„Ѓаволите“ одат на репрезентативна пауза со само три бода и на 14. позиција на табелата во Премиер лигата што веројатно е најава за уште една очајна сезона за нив.