Англиската Премиер лига вчера објави дека минатата недела е забележан рекорден број позитивни случаи во лигата на коронавирус.
Имено, дури 90 позитивни тестови се забележани меѓу дваесетте прволигаши. Станува збор за фудбалери, членови на стручниот штаб и помошен штаб во тимовите од Премиер лигата. Претходниот рекорд по бројот на заразени беше забележан една недела порано кога имаше двојно помалку позитивни тестови (42).
Иако Премиер лигата, како и цела Велика Британија, моментално се бори со најжестокиот бран на пандемијата и некои клубови повикаа на прекин на првенството, тоа нема да се случи.
На заеднички состанок, клубовите одлучија да ја продолжат Премиер лигата, но беше истакнато дека тесно ќе соработуваат со владата и локалните власти и брзо ќе реагираат на некои нови околности.
Минатата недела беа закажани две кола од Премиер лигата. Во текот на неделата три натпревари беа одложени, додека викендов од десетте натпревари од 18. коло се одиграа само четири. Коронавирусот одложи дури шест состаноци во текот на саботата и неделата. Интересен е податокот дека 77 отсто од премиерлигашите се вакцинирани со две дози, а само 16 отсто со сите три дози.
